भीमरूपी स्तोत्र

   ।। भीमरूपी स्तोत्र ।।

                 भीमरूपी महारुद्रा वज्र हनुमान मारुती । वनारी अंजनीसुता रामदुता प्रभंजना  ।।१।                             महाबळी प्राणदाता सकळा उठवी बळें । सौख्यकारी दुःखहारी धुर्त वैष्णव गायका ।।२।।

दीननाथा हरीरूपा सुंदरा जगदंतरा । पातालदेवताहंता भव्यसिंदुर लेपना  ।।३।।

लोकनाथा जगन्नाथा प्राणनाथा पुरातना । पुण्यवंता पुण्यशीला पावना परितोषका ।।४।।

ध्वजाग्रें उचली बाहो आवेशें लोटला पुढें । काळाग्नी काळरुद्राग्नी देखतां कांपती भयें  ।।५।।

ब्रम्हांडे माइली नेणों आवळे दंतपंगती । नेत्राग्नी चालिल्या ज्वाला भृकुटी ताठील्या बळें ।।६।।

पुच्छ ते मुरडिलें  माथां किरीटी कुंडले बरीं । सुवर्ण कटी कांसोटी घंटा किंकिणी नागरा  ।।७।।

ठकारे पर्वता ऐसा नेटका सडपातळु । चपळांग पाहतां मोठे महाविद्द्युल्लतेपरी  ।।८।।

कोटीच्या कोटी उड्डाणे झेपावे उत्तरेकडे । मंद्रादीसारखा द्रोणु क्रोधें उत्पाटीला बळे  ।।९।।

आणिला मागुती नेला आला गेला मनोगती । मनासी टाकिले मागे गतीसी तुळणा नसे ।।१०।।

अनुपासोनी ब्रम्हांडा एवढा होत जातसे । तयासी तुळणा कोठे मेरूमंदार धाकुटे ।।११।।

ब्रम्हांडाभोवतें वेढे वज्रपुच्छें करू शके । तयासी तुळणा कैची ब्रम्हांडी पाहता नसे ।।१२।।

आरक्त देखिले डोळां ग्रासिले सुर्यमंडळा । वाढतां वाढतां वाढे भेदिलें शुन्यमंडळा ।।१३।।

धनधान्य पशुवृध्दी पुत्रपौत्र समस्तही । पावती रूपविद्यादी स्तोत्रपाठे करुनिया ।।१४।।

भुतप्रेतसमंधादी रोगव्याधी समग्रही । नासती तुटती चिंता आनंदे भीमदर्शने ।।१५।।

हे धरा पंधरा श्लोकी लाभली शोभली बरी । दृढदेहो निसंदेहो संख्या चंद्रकळा गुणे ।।१६।।

रामदासी अग्रगण्यु कपिकुळासी मंडणु । रामरूपी अंतरात्मा दर्शने दोष नासती ।।१७।।

।। इति श्रीरामदासकृतं संकटनिरसनं मारुती स्तोत्र संपुर्णं ।।